من واو ابن عنبوص / مركبنا رِسيِت

                            من واو ابن عنبوص 

                                          مركبنا رِسيِت                     

      عبدالناصر أحمد

مركبنا رسيِت ماحلَّاش

جَلَح المَراكبي وجلحنا

وقَصَبها ماصِخ ما حلَّاش

والفقر جاها وجلحنا

مركبنا رسيت علي البر

وطلعت اعد الغَنايم

لا لقيت لا قيضي ولا بر

ولا فيه دَشيش للغنايم

مركبنا رسيت جاهاش ريح

مستنِّي يمكن تِواتي

دي مشرّحة الحر شرِّيح

وف باطها واخدة الفَواتي

مركبنا رسيت علي الهيش

إرمي الهلوب يا مراكبي

ولا حد عارف فيها يعيش

دا بايِنُّه جَملِك برك بي

ريّسها فوق راسه ضربوه

كانسين ابوه بالمقشّة

قعمِز في طولي وقول بووه

فضفض معاي فِ المَفَشّة

مركبنا غطست ما قَبّاش

والندل شال السَقايل

لو فرع ناجح تِقبّاش

قُب اللي مال والَثقايل

..

مركبنا رسيت قبال طوخ

حمّلنا فوقها الشوايل

الحر طملل قَبْ لْطوخ

ورّونا..  فيها الهوايل

مركبنا رسيت في برديس

وابو مين ما يرمح يحلِّق

كارهاك فؤادة يا عتريس

لو دم .. عندك  .. تطلّق

مركبنا يشبه سفين نوح

ما ركبشي فيه الشَقايا

الخلق جضّت وبتنوح

في دمشق واللي فْ مَضايا

مركبنا رسيت قبال صوص

ع البر نجري اتصدعنا

اللص قاسم مع لصوص

واحنا اللي..  في النص ضعنا

مركبنا رسيت حِدا النجع

مصنعها  رافض قَصَبنا

من جِدرُه غيطي اتقلع قلع

ووكيلنا ربي وحسيبنا

مركبنا رسيت بلا شراع

والخلق كاتم نفَسها

لولاشي عافية اتلوَي دراع !!

ولا جِد ابوه كان عَفَصها

مركبنا رسيت علي الجال

ولمين ألافِي الحِبالة ؟

وطلبت نجدة من رْجال

ما خادوش بإيدي الزبالة

مركبنا رسيت في بولاق

فوق منها ياجي الف جَرَّة

من بعد خيمة وغُشلاق

دلوقتي ملكوا المَجَرَّة

مركبنا راسية شتا وصيف

وحلفنا ليك ع البخارى

لم فيها دَفّة ومجاديف

ولا راية فوق الصواري

مركبنا يشبه لجندول

والندل بِيده خَرَقها

ابليس يخطط لجن دول

ما ارتاحوا الا بغَرَقها

مركبنا رسيت نَواحِيه

حلف الخسيس ما يساعدنا

جابرنا برضك تنحِّيه ؟

وتجيبي كاسر ساعدنا ؟