قنا يابلدى
أنا خطارى وأصلى قناوى
وقنا دى بلدى وإسمها داوى
إسمع منى أنا مش حاوى
وللزجل والشعر انا غاوى
إسمع منى يا سيدى موالى
*********
قنا يابلدى ف حضنى تعالى
قنا يابنت العصر الحالى
فيكى حضاره قديمه بتلالى
وتقول للعالم شوفوا جمالى
************
قنا من يومها أصيله وحُرّه
وللأعادى يا ناس قنا مُرّه
مفيش إهانه ليها بالمره
وآدى مثل إسمعه بالمره
***********
حكايه مشهورة ميّه لميّه
سببها حمله فرنسيّه
دخلت بلادنا العربيّه
واختارت الارض المصريّه
***********
كان بيقودها نابليون
قائد مشهور وراجل ملعون
مغرور ومتكبر فى الكون
جانا بجيوش قُرب المليون
********
طمعان وليه فيها ماآآآاارب
واخد يقاتل ويحارب
ويزحف علينا ويقارب
كان ناسى إن احنا عقارب
*********
والمصريين بيدافعو كمان
إيد واحده من كل الأديان
بشده وعزم مع الإيمان
لاجل الشرف ما يكون منصان
********
سمعوا الصعايده بإخوانهم
وعرفوا كل اللى جرالهم
واتلموا هما وأعوانهم
بشهامه يحكيها زمانهم
*********
قصدوا الدفاع عن أراضيهم
والشرباين ف عنيهم
بسلاح قليل كان ف إيديهم
والمولى كان هو راعيهم
*********
نزلوا عليهم كالأمطار
وادرك نابليون الأخطار
وراحتله يا اخوانه الأخبار
فضل يغوص ويا الأفكار
**********
وإكمنه كان راجل طماع
أخد يفكر فى الأوضاع
مع المساعدين والأتباع
*********
فكر بونابرت ياناس وإختار
قائد عظيم والله وجبار
هو ديزيه والله يا أخيار
**********
طبعا ديزيه راجل حازم
كان مساعد ليه وملازم
وكان مصمم والله وعازم
على غزو الصعيد بيقول لازم
************
جالنا ديزيه بجيوش وجنود
قصده يحكم فينا ويسود
وياخد منا حضارة الجدود
لكن لقى قدامه سدود
*********
ف قريه صغيره تسّمى البارود
الإسم بارود وهى بارود
وقف ديزيه عند البارود
بسلاح حديث وكُتر جنود
********
على البرّ كان واقف بيقول
لجنوده يلا اهجموا علطول
فى البحر كان جايب اسطول
بجنود وأسلحه كان محمول
*******
أخد يحارب ويقا تل
وشبابنا كان والله يناضل
لاجل الشرف ما يكون فاضل
********
قتل كتير من أبطالنا
وكادت تدهور أحوالنا
لولا بساله أبطالنا
*******
نزلوا البحر وعاموا فيه
واتوصلوا لاسطول ديزيه
إتسلقوه وركبوا عليه
واخد الصعيدى يقتل بإيديه
*******
مسكوا الجنود وقتلوهم
وف لمحة عين كانوا نسفوهم
والنيل ده كان مدفن ليهم
وسمكنا إ ستمتع بيهم
*********
دول كانوا لينا ناويين شرّ
والهجوم كان بحر وبرّ
لكن الصعيدى أصيل وحُرْ
مرضيش يستنى ويُصبُرْ
وسقى الأجانب كاس المُرْ
وراحت فرنسا ووراها تجُرْ
ديل الخيبه وحال ما يسُرْ
********
هى دى قنا برجالها يا ناس
قوة وعزم مع الإخلا ص
ضربوا فرنسا ف نص الراس
بالقُله والعصا والبلاص
وراح العدو من بينا خلاص
*********
قنا برجالها شهامه وهِمَه
كرم وجود يا اخوانه وزِمَه
وابن قنا معروف بالعِمَه
عمه تقول إن انا فى القِمَه
*********
قمة مجد وعظمه ونور
وضعوها لينا جدود ف قبور
رمسيس ومينا مع حتحور
********
بلدنا ياناس ليها حق عليكم
ومستقبلها اهو بين ايديكم
جاهدو وناضلوا بكل ما ليكم
لاجل تنولوا اللى هيرضيكم
ويرضى بلدنا وينور ليكم
وفى النهايه سلامو عليكم
0 تعليقات:
إرسال تعليق
شاركنا برأيك
الاشتراك في تعليقات الرسالة [Atom]
<< الصفحة الرئيسية