اتدلعوا .. من ديوان الدلع والوجع لـ عادل سلامة

اتدلعوا 
ودلّعوا
من أول اللى بيرضعوا 
للى سنانه اتخلّعوا
العمر من غير الدلع
ماسخ أوى ما أدلعُه
ما أضيعُه 
العيشة مُرّة زى شاى اسود تقيل
حبة دلع هينعنعُه
لو صادفك الناى اسمعه
خد منه حكمة واتبعُه
الناى حزين ما أوجعُه
لكنه شاف هز الصبايا
ومسكة الجدعان عصايا 
قام راح قالبها فرفشة 
كل الحزانى اتحزموا واتشخلعوا 
فاتدلعوا 
العمر زى الفيلم فيه انت البطل 
ومهما طال هتودعُه 
المشهد اللى يعدّى منه مستحيل هترجعه 
خليك مركز فى اللى جاى زى الرقيب
وتعالى ع الشوت الكئيب 
وهات مقصّك واقطعه 
من غير مبرر فى الدراما
اعمل مشاهد حُب ياما
وكتّروا البوس واشبعوا 
كل اللى جواك طلعُه 
وان حد قال ع الفيلم هابط
وبصّلك وكأنه ظابط
وشكله عايز يمنعه 
إديله رشوة مشهدين حلوين كده 
يمكن عيونه يلمعوا 
ويروح يجيب كل اللى زيه يشجّعوا
أما اللى عامل فيها فِلّة
وجى يمسك علينا ذلّة 
هيموت بداء النفسنة 
لأنه عايش كام سنة 
فى فيلم هوّا مرقّعُه 
ولما باظ منه وغِلِب 
قرر علينا يتقلب
والغيظ خلاص هيفرقعُه
وعاش فى دور ناقد قديم
بيزوم ويرفع إصبعُه 
اقفل فى وشه الباب قوى
لأ .. ارزعُه
وخد فى احضانك حبايبك بالقوى
واتمتعوا
فوق فى السما ياللا اطلعوا
فوق السحابة اتربّعوا
وفضفضوا وبعبعوا 
خدوا من لبان الدنيا دى كل العسل
والباقى بلالين طرقعوا 
هيقولوا مهما يقولوا عادى مايوْلعوا 
هيفوقوا بعد فوات أوان المنجهة ويعيطوا ويدمّعوا
على كل لحظة ف عمرهم عدت هدر
ويحطوا لومهم ع القدر 
والعمر مين هيرجّعُه 
فاتدلعوا 
الــــهؤا 
اتدلعوا
الـــــهؤا 
اتدلعوا
الــــــهؤا