قالوا حسين .. فكنت بقلم ابن الشهيد

أخبار نقادة |

قالوا  حسين .. فكنت

بقلم . حسين محمد ( ابن الشهيد )

كل مايرد هنا من  أحداث  تتشابه  مع ما حدث بالفعل  في فترة السبعينيات  ،  حقبة  الزمن الجميل  .

مشهد رقم (1)

امي كانت حامل ليها 7 شهور وحست أنها هتنزل العيل  ..

جدي قال خلوها تغور بيت أبوها حتي لو ماتت يبقي ماتت هناك  ..

وعلي عربية الكارو ركبت وأخدت شويه هدوم وأول ما وصلت بيت أبوها العيل نزل بس 7 شهور ..

فيه واحده من الحريم مسكت العيل واشتغلت تفرز في أعضاءه تشوفه يكون فيه رجل ناقصة  أو يد ناقصة  أو حتى  صباع  ..

اشتغلوا يبوسو في وش الطفل لغاية ما وشه اتعبي تفاله من خشوم الحريم ..

وكل شويه يبصو في وشه يشفوه حي ولا مات ..

الناس كلها قالت الواد ده هيموت نازل ناقص شهرين .....مكنش فيه حضانات ..

واحده قالتلهم حطوه تحت مجور لأن الماجور بيدي نفس درجة حرارة بطن الأم ..

وناس تانيه قالت لا ...قيدو نار حواليه عشان يدفي وطبعا الكلام ده كان في الصيف

مشهد  (2 )

 جدتي أم  أمي بعتت رسالة  مع واحدة كانت رايحة تشتري مش من بيت أبوضوي تقول لجدي الشهيد ..

ان أمي ولدت واد عفش وأسود ..

وناقص شهرين ومات مات قعد قعد ..

وأبقي أكتبوه في الوحدة ..

جدي ما كدبش خبر وأعطي تعليمات شديدة اللهجة محدش يودي نفاس ..

عشان الواد ده هيموت وكلها يومين وأمــه جايه تاني ..

فبلاش نخسر علبة السمن البلدي وشوال غلة والكام قرش في عيل ميت..

مشهد (3 )

أمي بتبكي عشان مافيهاش لبن وعايزه ترضع العيل..

واحده قالتلها في بيت أب عبد العال واحد معاه نعجة والده اديلة  شويه لبن مع إضافة شوية ميه ..

عشان ما يموتش وأوعي تسقيه لبن بقر أو جاموس..

وكمان فيه واحدة  في الشارع بترضع ولدها نوديه يرضع منها عشان ما يموتش..

مشهد (4)

في اختيار الاسم جدي قال سموه شحات عشان يعيش..

معذور الشهيد كان عديم ثقافة ماكنش معاه فيس بوك..

ويمكن لو كان فيه مسلسلات تركي كان قال سموه مهند..

أمي قالت نرميه للكلاب تاكله ؛ ولا أسميه شحات..

أختي الكبيرة قالت سموه عبد الحليم  ؛ عشان كان متسيط ايامها..

امي قالت لا أخوه اسمه حسن

يبقي ده نسميه حسين   ..  وقد كنت