أنا من قنا قصيدة للشاعر عبدالله صبري

أخبار نقادة

أنا من قنا

الشاعر / عبدالله صبري

أنا ابن الجنوب اللي خارج يدوَّر
علي نكتة تمسح ذنوب الحياة
وابويا الصعيدي اللي لو قلبه كشَّر
تكشَّر جميع الكواكب معاه
بنسقي العيال اللبن بالبنادق
ونهدي الزمن ضحكته الفاترة
وما يهمناش اللي حاصل في مصر.. البعيدة الغريبة اللي في القاهرة
ويسقط نظام الوطن و لا يفضل
هتفرق في أيه في الأساس عندنا
ماهو احنا ائتلاف انكشاف الغياب
اللي زارع غيطان القصايد هنا
ومختوم قفانا بعزف الشوارع
ورش البراءة علي الأمكنة
صعايدة و كتاب التاريخ المزيف
ماجاش يشرب الشاي في يوم وسطنا
وبندُقّ عصافير وحب وأغاني
ف قلوبنا عشان ننقذ الأزمنة
أنا من بلاد قايدة نار أيدها خشنة 
وعطفًا على الدال تشوف جيشنا ديشنا 
وبتقابل الموت تقول ياض واحشنا
وتتّكا ع السين تصير سوسنة
ولا نخاف حكومة ولا نهاب دقون
وبنخاف من العيبة مش م القانون 
ونثبت على الخير لو الدنيا مالت 
ومالناش لا أهداف ولا يحزنون
أنا ابن البلاد اللي فوق الخريطة 
ييجي النيل قصادها وياخدله لفة 
بنسمحله أصلاً يعدي بمزاجنا 
صعايدة وكلامنا ماهوش كدب زفة 
بنمشي بهموم بس مش واحدة واحدة 
ونتعالى ع الشكوى والدنيا جاحدة
يروح الصباح دا / نجيب الصباح دا 
ونزحف ورا الحق والناس تفوتنا
ما نشغلشي بالنا بمين جنبنا 
أنا من قنا
أنا من قنا
أنا من قنا