اسمع كلامي

بقلم . أسماء عبدالغني أحمد

اسمع كلامي وافهمه

حطه في عقلك واوزنه

واوعى تجيلي ترنمه

وتقوللي ده شعر وخلاص

أنا جاي أقولك ع الحكاية

تعرف بقى فين البداية

وهي ليه دي النهاية

أصلى مش قادر يا ناس

أنا جاي اقولك انت يا يابا

وانت ِ كمان يا أم الغلابة

بتقوللي ليه عايشين في غابة

ما الغابة دي ليها أساس

مش أصلها إنسان وناس

وهما مين هما ولادك

دول عيالك

لما خلاص ما بقوش ف بالك

ضاعوا أهم وسط الديابة

ضاعو وتاهو في المشاكل

ضاعوا يابا بين المشاغل

مش كنتوا بتشوفوا ولادكم

بيخرجو بالليل قصادكم

وبيرجعوا متأخرين

مبتسألوش دول كانوا فين

وهما ليه كده تعبانين

ليه الشفايف ضحكانين

والقلب من  جوه حزين

يمكن يكونوا مدمنين

والبنت دي مالها غريبة

كان لبسها عبايات وجيبة

دلوقتي أصبح بنطلون

وف وشها ميت لون ولون

والشعر باين من حجابها

يوم القيامة هيكون عذابها

مبتسألوش

مبتعرفوش مبتعملوش

معلهش اصلكو مشغولين  

وعن الحقيقة غفلانين

الأب بيجمع فلوس

والأم غسالة وعجين

أو حاطة ميكب ومعرفش مين

وبردو لسه موهومين

وعن الحقيقة غفلانين

مبقلش تبعدوا من المشاغل

مهو كلنا ليها محتاجين

أنا نفسي تبعدوا من المشاكل

ومن وقتكو شوية حنية

من حضنك كده قربيها

وبكل رقة واسأليها

مال الجميل وشه حزين

وانت كمان روح واسأله

بقى نفسك ف بنت الجيران

وهي عايزاك من زمان

هنروح لأبوها ونطلب إيديها

بإذن الواحد المنان

ما هي دي يا ابني الأصول

يعني بقى قصر الكلام

كل اللي عايز من الأنام

يفهم حديث خير الأنام

( كلكم راع )

مش مخلوقين كده والسلام .